12-14 aprel tarixlərində “Bakı Ekspo” mərkəzində 6-cı Qafqaz Beynəlxalq Mehmanxana, Restoran və Supermarketlər üçün Avadanlıq və Ləvazimatlar Sərgisi keçiriləcək. “Horex” sərgisi Azərbaycanda otel və restoran sahəsinin peşəkarları üçün ideal iş meydançasına çevrilmiş yeganə ixtisaslaşdırılmış tədbirdir. Bu sahənin ən son bazar tələblərinə uyğun olan yenilik və təkmilləşdirmələri sizin qonaq qəbul etmə (otel, restoran və s. bu kimi) xidmətinizi dünya standartları səviyyəsinə qədər yüksəltməyə imkan verəcək. Sözügedən sərgi çərçivəsində Avstriya, İtaliya, Almaniya, Belçika, Rusiya, Türkiyə, Ukrayna və Fransadan olan aparıcı şirkətlər mehmanxana, restoran və otellər üçün peşəkar mətbəx və camaşırxana avadanlıqları, məişət kimyası, parçalar və eksklüziv qab-qacaq, otellər üçün “onlayn” bron etmə və ödəniş sistemləri kimi informasiya texnologiyaları və bir çox digər xidmətlər təqdim edəcəklər. Ekspozisiyaya daxil olan qonaqpərvərlik sənayesinin “La Cimbali”, “Santos”, “Robot Coupe”, “Rational”, “Winterhalter”, “Karma-Global”, “Rotondi”, “Scotsman”, “Modular”, “Bonnet”, “Sagi Spa”, “Rovabo”, “Danube International”, “Muehldorfer” və “Ingrid Lesage Creations” kimi məşhur brendləri və digərləri mehmanxana, restoran və supermarketlərin parlaq ifadə olunan özəlliklə seçilməsinə kömək edəcəklər. Sərgi çərçivəsində iştirakçı şirkətlərin stendlərində təqdimat mərasimləri və bütün dünyada məşhur olan mütəxəssislərin iştirakı ilə ustad dərsləri (“master class”) keçiriləcək. Sərginin təşkilatçıları Böyük Britaniyanın “ITE Group plc” və onun Qafqazdakı tərəfdaşı “Iteca Caspian LLC” şirkətləridir.