8 fevral tarixində saat 13:00-da Şahdağ turizm kompleksində ikinci dəfə olaraq ən ekstremal və şən qış müsabiqəsi – Red Bull Shakh Carpet keçiriləcək!

Hərfi mənası “Xalçaların Şahı” olan müsabiqənin ideyası ondan ibarətdir ki, müxtəlif kostyumlar geyinmiş, dağdan enmək üçün istənilən vasitələrlə təchiz olunmuş iştirakçılar enişin sonunda kiçik tramplinin üzərindən hovuza atlanırlar. Əsası odur ki, iştirakçıların xüsusilə müsabiqə üçün düzəltdikləri hərəkət vasitələrinin əsas elementi mütləq XALÇA olmalıdır!

Qeydiyyatdan keçmək üçün iştirakçılar qabaqcadan komandanın kreativ konsepsiyasını və adını fikirləşməli, xalça ilə sürüşmək üçün vasitəni düzəltməli, həmçinin müvafiq şən kostyumlar hazırlamalıdırlar. Müsabiqədə iştirak üçün ən kreativ 20 komanda seçiləcək. Hazırda 15 komanda qeydiyyatdan keçib.

Qalibləri üç kriteriyada juri müəyyənləşdirəcək: ən yaxşı tullanma, ən kreativ kostyum və çıxış, tamaşaçı simpatiyası.

– Komanda 2-3 iştirakçılardan ibarət olmalıdır.

– Təchizat - əldəqayırma xalçalar (konstruksiyaların qurulmasında xizəkdən, snouborddan, altı buz bağlamış yeşiklərdən və ya qar üzərində hərəkət üçün istənilən digər “hərəkət vasitələrindən” istifadə edilə bilər).

– Hər komandanın çıxışı üçün 5 dəqiqə verilir (performans – tullanma) .

– Hər tullanma hakimlər tərəfindən növbəti meyarlara əsasən qiymətləndiriləcək: fəndin (tullanmanın) icra texnikası, kostyumların və çıxışın özünün kreativliyi, tamaşaçıların simpatiyası.

Unikal tamaşa, unudulmaz əyləncə, bol drayv və ekstrim, eləcə də bir çox maraqlı mükafatların olacağına zəmanət verilir! Kreativ konsepsiyaları və konstruksiyaların/kostyumların eskizlərini gözləyirik. Tələb olunarsa, təşkilatçılar hazırlıq prosesində öz məsləhətləri ilə məmnuniyyətlə kömək edəcəklər.

Layihə Şahdağ turizm kompleksinin dəstəyi ilə həyata keçirilir.