16 may Bakıda “28 Cinema” kinoteatrı və “Nargis” jurnalının birgə təşkilatçılığı ilə “Dahi Qetsbi” filminin qapalı premyerası keçirilib. Tədbirə ölkənin bir çox məşhur simaları, mədəniyyət və incəsənət xadimləri, iri şirkətlərin rəhbərləri və ictimai xadimlər təqdimat üçün salınacaq qırmızı xalça üzərinə keçiblər. Çoxlu sayda peşəkar fotoqraflar isə bütün tədbir boyu məşhurları çəkiblər. Tədbir, həmçinin ölkənin aparıcı kütləvi informasiya vasitələri, media nümayəndələri tərəfindən işıqlandırılıb. Tədbirdə əvvəlcə bahalı hədiyyələrdən ibarət oyunlar təşkil edilib.
Daha sonra kinoteatrın bütün zallarında film nümayiş olunub. Nümayişdən sonra furşet təşkil olunub və sonda after-party ilə davam edib.
Qeyd edək ki, “Dahi Qetsbi” Amerika yazıçısı Frensis Skott Fitsceraldın eyni adlı əsəri əsasında ekranlaşdırılıb. Hadisələr Nyu-Yorkda, XX əsrin 20-ci illərində, həyatın sürətlə dəyişdiyi bir dövrdə cərəyan edir. Filmin baş qəhrəmanı heç kəsə məlum olmayan, sirli Qetsbidir. Bəziləri onun varlığına inanmır, bəziləri isə onun müharibə qəhrəmanı olduğunu deyir. Lakin bir həqiqət var ki, onu çox adam görüb, amma onun həmin Qetsbi olduğundan şübhələnməyiblər. Tezliklə, Qetsbiyə gözəl bir qadın vurulur. O da bu qadınsız yaşaya bilmədiyini anlayır. Lakin onunla birgə olmaq üçün Qetsbi çox şey etməlidir.