Oktyabr ayının 23-də Bakıda Azərbaycan Rəssamlar İttifaqının himayəsi altında "HəArt" art-konsaltinq qrupunun həyata keçirdiyi "İncəsənətə HƏ" layihəsi çərçivəsində "Biri var idi, biri yox idi..." sərgi layihəsinin açılış mərasimi baş tutacaqdır. Azərbaycan Respublikası Mədəniyyət və Turizm Nazirliyi, eləcə də Azərbaycan Respublikası Səhiyyə Nazirliyinin dəstəyi ilə keçirilən incəsənət sərgisi zamanı müxtəlif yaş qruplarına aid uşaq və yeniyetmələrin təsviri və tətbiqi incəsənət sahələrində olan əsərlərini nümayiş etdiriləcəkdir. Kuratorlar sərginin mövzusunu nağıllara həsr ediblər çünki, nağıllar həm uşaq və böyükləri, bir sözlə bütün yaşdakı insanları birləşdirən bir növ unikal, lakin eyni zamanda da hər zaman müxtəlifliyə can atmasıla paradoksal şəkildə bir-birinə oxşar bir qeyri-adi aləmdir. Kiçik rəssamlar ziyarətçiləri incəsənətin sehirli dili vasitəsilə özlərinin "kiçik" dünyalarına, "nağıllar diyarına" səyahətə dəvət edirlər. 
Layihə çərçivəsində kuratorlar incəsənət sahəsində (rəsm, heykəltəraşlıq, tətbiqi incəsənət, və s.) fəaliyyət göstərən uşaq art studiyasının (GünxanArt studio) şagirdlərini olduğu kimi, eləcə də, xüsusi qayğıya ehtiyacı olan uşaq və yeniyetmələrin təhsil aldığı ixtisaslaşmış təhsil müəssisələrinin (“Müşviq” Qaradağ əlil mərkəzi) yetirmələrinin işlərini sərginin işinə daxil etmişlər. Sərgi təşkilatçıları bu iki müxtəlif aləmləri rəmzi olaraq təmsil edən uşaq-rəssamların incəsənət və dünyaya baxış prizmasından təhsil prosesində bədii təhsil və sənətin özunəməxsus rolu və hər bir uşağın şəxsi keyfiyyətlərinin formalaşmasında xüsusi təsirini müəyyən etmək və geniş kütlələrin diqqətini bu məsələyə çatdırmağı özünə məqsəd qoymuşdur.
Bu məqsədlədir ki, oktyabrın 24-də xüsusi mütəxəssis, səhiyyə işçiləri, pedaqoq və rəssamların iştirakı ilə bu aktual mövzu ətrafında geniş ictimai müzakirələr təşkil ediləcəkdir. 
Sosial xarakter daşıyan "İncəsənətə HƏ" layihəsi "HəArt" art-konsaltinq qrupu tərəfindən geniş kütlələrə çağırış olaraq başladılmışdır. Əsas hədəflər incəsənət sahəsinin Azərbaycan uşaqların təhsil prosesində, eləcə də, onların şəxsiyyətinin formalaşmasında əhəmiyyətini, habelə təhsil prosesinin məcburi tərkibinə çevrilməsi mövzusunu gündəmə gətirməklə geniş kütlələrin diqqətini bu məsələlərə cəlb etməkdir. 
Bu tədbirlər layihə çərçivəsində ilkin mərhələ olaraq reallaşdırılır. Layihənin yaxın zamanda fəaliyyətinin daha da inkişaf etdirilərək müxtəlif ölkələrdən olan uşaq, yeniyetmə və gənc istedadların da iştirakı ilə böyük bir beynəlxalq səpgidə davam etdirilməsi nəzərdə tutulur. 
Sərgi öz işini oktyabrın 26-dək davam etdirəcəkdir.
"Bir var idi, biri yox idi..." sərgi layihəsinə təşkilati dəstəyi İnisiativ Kuratorlar Birliyi (İCU) və müasir incəsənət qalereyası Yeni Gallery, informasiya dəstəyini art-bloq Azartbox və texniki dəstəyi reklam və poliqrafiya şirkəti "Azeri dizayn" göstərirlər.

23 Октября - 26 Октября