17 may 17:00-da Muzey Mərkəzinin Sərgi Salonunda Xalq Rəssamı Mayis Ağabəyovun 70 illik yubileyinə həsr olunmu fərdi sərgisi açılacaq. Sərgidə onun rəsm əsərləri təqdim olunacaq. Mayıs Ağabəyov 1941-ci ildə Bakıda anadan olub. Mayis Ağabəyov öz həyat və yaradıcılığını bütünlüklə Azərbaycan təsviri və kino sənətinin inkişafına həsr etmiş, sözün əsl mənasında rəssam adına layiq nadir şəxsiyyətlərdən biridir.

Onun yaradıcılığı bir neçə istiqamətdə formalaşıb inkişaf etmişdir. Hələ gənc yaşlarından etibarən öz sənətinin vurğunu olan rəssamı həyatdakı elə məsələlər, elə bədii tapşırıqların həlli düşündürürdü ki, onlara dövrün heç də bütün rəssamları diqqət yetirmirdilər. Onun “Torpağın məhsulu”, “Qadınlar və uşaqlar”, “Analıq”, “Rəssamın emalatxanası”, “Alma” və s. kimi əsərləri hər dəfə yeni baxışda, yeni münasibətlə işlənsə də onları birləşdirən ümumi cəhətlər də çoxdur.

İlk növbədə rəssamın rənglər aləmi, qırmızı, sarı, yaşıl, qızılı, qara və ağ rənglərin elə incə nüanslarını rəssamın tablolarında görürük ki, onlar birlikdə bir-birinə mane olmur, əksinə həzin bir harmoniya yaradır. Bu əsərlərin hər birində insanı ilk öncə özünə cəlb edən nə isə gizli bir müəmma, mistik əhval ruhiyyə hiss olunur. M.Ağabəyovun kompozisiyaları daim bitkinliyi ilə seçilir. Təsvir müstəvisində nə bir artıq cizgi görsənir, nə də boş lüzumsuz məsafə saxlanılır.
Sərgi mayın 23-ə qədər davam edəcək.